السلام عليكم و رحمه الله و بركاته
جزاك الله كل خير اختى على طرح هذا الموضوع
انا بقالى فتره مش دخلت الموقع هنا و لما دخلت النهارده وجدت اسمى و كانت مفاجاءه لى و افتكرت ان مش انا المقصوده ممكن تكون اخت تانيه و قلت ادخل اجاوب صحيح دى اول مشاركه ليا من يوم ما سجلت فى الموقع و اتمنى بجد انها مش تكون الاخيره
المهم علشان مش اطول عليكن
انا متزوجه و عندى بنت وولد و اعيش مع زوجى فى بلد اوروبى
حياتى السابقه لم تكن لها اى قيمه معلوماتى الدينيه قليله و لم اكن ملتزمه صحيح محجبه بس حجاب عادى
و الحمد لله الان اجاهد نفسى من اجل الالتزام هدانى الله تعالى الى الطريق و ابتديت الحمد لله رب العالمين
هدانى الله الى الصحبه الصالحه تعرفت عليهم ووجدتهم صحبه جميله جدا تعين بعضها على الطاعه
بدات اتعلم منهم اشياء لم اكن اعرفها من قبل جزاهم الله كل خير
اخت منهم تعرف هذا الموقع و كانت مره بتتكلم عنه جزاها الله خيرا
اخدت الرابط و سجلت في الوقع بس لما كنت بادخل مش كنت عارفه ابتدى من فين
و كل مره ادخل اخرج تانى
عاوزه اتعلم علشان اكون ملمه بامور دينى نفسى اقرب من ربنا قوى
اعرف ايه بيحبه و اعمله و اللى مش بيحبه ابعد عنه
عاوزه اتعلم علشان اربى اولادى تربيه دينيه سليمه نفسى يطلعو متدينين و ملتزمين
مش عارفه جوايا حاجات مش عارفه اقولها ازاى او مش عارفه اوصفها
نفسى اتعلم حاجات كتير زى الفقه و التجويد و الاحاديث و التفسير
نفسى احفظ القران الكريم بس مش حفظ بس لا و اعمل بيه كمان
اسفه لانى لم اكتب باللغه العربيه و كتبت بالعاميه
جزاكم الله كل خير جميعا و جعل ما تقومون به فى ميزان حسناتكم
|